Sot shënohen 25 vjet nga dita kur për herë të fundit u pa i gjallë profesori, mendimtari dhe veprimtari i shquar nga Krusha e Madhe, Ukshin Hoti. Ai u nxor nga burgu i Dubravës më 16 maj 1999, me pretekstin se po lirohej, por që nga ajo ditë fati i tij mbetet i panjohur.

Përfaqësues të institucioneve, familjarë dhe qytetarë, nga shtëpia e tij në Krushë e Madhe dhe nga muzeu kushtuar figurës së tij, kërkojnë sërish drejtësi dhe zbardhjen e fatit të tij. Mesazhi i përbashkët mbetet i qartë: Ukshin Hoti nuk është harruar dhe kërkimi për të nuk do të ndalet derisa të ndriçohet e vërteta.

Në një reagim, kryetari i Komunës së Rahovecit, Smajl Latifi, theksoi se zhdukja e Ukshin Hotit nuk ishte e rastësishme, por pjesë e një plani të orkestruar nga qarqet serbe për ta larguar atë nga skena politike, për shkak të fuqisë së mendimit të tij dhe rolit që mund të kishte në proceset historike të shqiptarëve.

Citat i plotë nga Smajl Latifi

“25 vjet më parë, ishte hera e fundit që u pa i gjallë veprimtari, kryengritësi, intelektuali dhe mendimtari i guximshëm nga Krusha e Madhe, Ukshin Hoti. Ai i përket profilit më të lartë të dijetarëve shqiptarë, i cili tërë intelektin, dijen dhe trupin e tij ia fali çështjes shqiptare.
Më 16 maj të vitit 1999 (e diel), Ukshin Hoti ishte nxjerrë nga burgu i Dubravës me pretekstin se po lirohej. Në fakt, ky kishte qenë rrëmbimi i tij nga burgu drejt një destinacioni të panjohur edhe sot. Zhdukja e tij as nuk është e rastit dhe as aksident. Kundër tij ishin thurur plane e projekte, sepse serbët e vërenin që dheu po u rrëshqiste nën këmbë dhe se me mendjendriturit, siç ishte Ukshin Hoti, shqiptarët do të ishin më të fortë në proceset politike që do të pasonin pas largimit me turp të tyre nga Kosova.

Që nga viti 1981 e më pas, qarqet nacionaliste serbe e kishin orkestruar sulmin pikërisht mbi këtë shkencëtar të politikës, ngase aty e shihnin rrezikun e forcimit të rezistencës kundër hegjemonisë serbe. Prandaj, e burgosën dhe e izoluan nga shoqëria. Në fakt ky izolim erdhi edhe nga qarqet shqiptare, sepse Ukshin Hoti demaskonte politikën mediokre e pa vizion të disa shqiptarëve, të dorëzuar e nënshtruar përballë okupuesit të egër. Por jo edhe Ukshin Hoti. Ai që do të qëndronte vertikalisht dhe i bindur në të drejtën e vet dhe të popullit të tij për liri, demokraci e bashkim.

Ndriçimi i fatit të profesorit Ukshin Hoti është detyrë kombëtare, ndërkaq trashëgimia e tij intelektuale, e lënë në librat e teoritë e tij të shkruara, është shtegu që duhet ndjekur kombi ynë drejt civilizimit e përparimit mbarëkombëtar!
Edhe pas 25 vjetësh, pikërisht nga Krusha e Madhe e prej shtëpisë së tij, nga Muzeu kushtuar atij, pyesim:
KU ËSHTË UKSHIN HOTI?”
/Marrë nga Radio Kosova e Lire