Më 17 qershor 2025, Universiteti “Ukshin Hoti” në Prizren shënoi një ditë të veçantë akademike dhe historike: ceremoninë e diplomimit të studentëve, e zhvilluar në nderim të 82-vjetorit të lindjes së intelektualit dhe vizionarit të mendimit politik shqiptar, Ukshin Hoti, emrin e të cilit mban ky institucion i arsimit të lartë.

Aktiviteti u hap me intonimin e Himnit Kombëtar dhe atij shtetëror të Republikës së Kosovës, ndërsa më pas u bënë homazhe pranë shtatores së Ukshin Hotit në oborrin e universitetit. Në këtë moment solemn morën pjesë Kryeministri i Kosovës, Albin Kurti, dhe zëvendësministri i MAShTI-t, Taulant Kelmendi.

Pjesëmarrës në këtë ceremoni ishin edhe fëmijët e Ukshin Hotit, Andin dhe Brisilda Hoti, kryetari i Komunës së Rahovecit Smajl Latifi, konsulli i Republikës së Turqisë në Prizren, Celal Doğan, kryetari i Bashkësisë Islame në Prizren, Valon Ibrahimi, deputetë të Kuvendit të Kosovës, përfaqësues të KFOR-it dhe Policisë së Kosovës, si dhe kryetari i Këshillit Drejtues të Universitetit, Prof. Arif Murrja.

Fjalimet solemne nisën me rektorin Alishani, i cili vuri në pah simbolikën e kësaj dite për studentët e diplomuar dhe për vetë universitetin. Kryeministri Kurti, në adresimin e tij, e përshkroi Ukshin Hotin si një figurë të mendimit të lirë dhe të qëndresës intelektuale. Pas tij foli Andin Hoti, duke falënderuar institucionin për përkujdesjen e vazhdueshme për trashëgiminë e të atit. Në emër të studentëve të rinj të diplomuar, fjalën e mori Bleona Buduri, përfaqësuese e Parlamentit Studentor.

Momentet kulmore u shënuan me dorëzimin simbolik të diplomave përfaqësuese nga secili fakultet, në prani të dekanëve dhe stafit akademik. Ceremonia u mbyll me ritin tradicional të diplomimit: kalimin simbolik të penës dhe hedhjen e kapelave në ajër, duke shënuar fillimin e një etape të re për gjeneratën e re të të diplomuarve.
/Marrë nga UNI PRIZREN